​ស្ទឹងត្រែង​៖​សត្វព្រៃ​ជាច្រើន​ប្រភេទ ត្រូវបាន​គេ​ដាក់តាំង​លក់​ដោយ​សេរី​នៅលើ​ទីផ្សារ​ក្នុង​ខេត្តស្ទឹងត្រែង​ដូច ដាក់លក់​មុខទំនិញ​ផ្សេងៗ​ទៀត​ដែរ​។​សាច់សត្វ​ព្រៃ​ដែល​គេ​ដាក់លក់​នោះ មានដូចជា​សាច់ជ្រូក​ព្រៃ​សាច់​ឈ្លូស​និង​សត្វ​ត្រកួត​ជាដើម​។​
​សាច់សត្វ ទាំង​នោះគេ​តែង​ប្រទះឃើញ​អ្នកលក់ដូរ​ដាក់លក់​នៅ​ផ្សារ​ស្ទឹងត្រែង​មាន​ជា រៀងរាល់ថ្ងៃ​ហាក់បីដូចជា​មិន​ខ្លាចរអែង​សមត្ថកិច្ច​បន្តិច​ណា​ឡើយ​សូម្បីតែ មន្ត្រី​ជំនាញ​មេព្រៃ​។​

​ការ​ដាក់លក់​បែបនេះ​មានមតិ​រិះគន់ថា កន្លងមក​គេ​តែង​ឃើញ​មាន​ក្រុម​អង្គការ​សម្ព័ន្ធមិត្ត​សត្វព្រៃ​ចុះបង្ក្រាប ញឹកញាប់​ណាស់​។​ប៉ុន្តែ​សមត្ថកិច្ច​មួយចំនួន​នៅ​ខេត្តស្ទឹងត្រែង​ដូចជា នគរបាល​,​កងរាជអាវុធហត្ថ​ពិសេស​នោះ​គឺ​ជំនាញ​មេព្រៃ​តែម្តង​មិនដែល​ឃើញ មានការ​ចុះបង្ក្រាប​ម្តងណា​ទេ​។​ពេល​ក្រុម​អភិរក្ស​សត្វព្រៃ​ចុះបង្ក្រាប ទើប​ឃើញ​ចូលរួម​សហការ​។​

​ចំពោះ​សមត្ថកិច្ច​ក្នុង​ខេត្តស្ទឹងត្រែង មិនដែល​ឃើញ​ចុះបង្ក្រាប​បទល្មើស​ជួញដូរ​សត្វព្រៃ​ដោយ​ខុសច្បាប់​នោះ ធ្វើឱ្យមាន​ការសង្ស័យថា​សមត្ថកិច្ច​ក្នុង​ខេត្ត​នេះ​អាចនឹងទទួល ផលប្រយោជន៍​ណាមួយ​ពី​អ្នកលក់​សត្វព្រៃ​ជាមិនខាន​។​ពិសេស​គឺ​លោក​ឈាង​តុលា នាយ​ខណ្ឌ​រដ្ឋបាល​ព្រៃឈើ​ខេត្តស្ទឹងត្រែង​នោះ​តែម្តង​។​

​ទាក់ទិន ការ​ដាក់លក់​សាច់សត្វ​ព្រៃ​នៅ​ផ្សារ​ស្ទឹងត្រែង​នោះ​គេហទំព័រ​រស្មី​កម្ពុជា មិនទាន់មាន​ការបំភ្លឺ​ពី​មន្ត្រី​ជំនាញ​និង​សមត្ថកិច្ច​ពាក់ព័ន្ធ​នៅឡើយ​ទេ​៕

​